kun aragirang na an dahon kan adgaw
naghihingakdag an kmpot kaini sa sanga
naghihibog man an kuku sa saiyang kamot asin bitis
siring sa mahibog na ambon kan mata.
Laen sa bunga kan daga mantang naglalawig an aldaw
an tulang kan mga tinanom, an tulang niya nagagabok
nagtatakdag, nagpapaaram sa laman.
sabi an duros sagkod an mga dahon
nagtataram sana nin ikakarahay kan pagdangog
totoo gayud kun sa kaagahan o kaodtohan
kan sadiring bubon nin kusog
alagad kun an ibabaw kan bulod duwa na an kolor
o tiripo na an kudal nawawara na man an girok
nasasanglian an mga ngirit nin pagmundo
an dating mga nainabang
nag gono kan saimong kusog
tumang na sa umal na dating nagpabasog.
kun sa pasulnupon na saldang sa maaskad
na kadagatan nin paglalakaw
matatapos an siring na pag igot
mayo na gayod ikukusog nin higos
an magpadagos nin hangos.
an magsobang sa aganag nagpapaurog
kan pag-aragirang nin dahon
mayo na gayod ihihigos na kusog
na ilakdang an pasmadong bitis asin kamot
na kun mangitorogan sa matanga
nagtatalikod na an bulan
sa tamong saka ulunan
na urog kapait na nagdadalihig
an natatadang kusog
kundi an bolos nin luhanga dai nag oontok
tuyong hawak na gabok iduta an likod
sa banig tibaad iyo man saiya ipatos
kun dai na magtagboan an dungo asin hinagos
ta siring sa gamgam kun hapon na an saldang
mayo na nin sirbi an gurang ibarangbang.
Subscribe to:
Post Comments (Atom)
No comments:
Post a Comment